2Ti 3 | DAD | STEP | Anĩ ere, enei keleĩ youf. Idikeleya naa bun, morõ odug wõ youf.

2 Timothy 3

Idikeleya Naa Bun Tamo Kayau Negur Ditorõf

1 Anĩ ere, enei keleĩ youf. Idikeleya naa bun, morõ odug wõ youf. 2 Tamo kayau dogo nigin waud laa fouf, moni nigin waud laa fouf, yeneid dalesauf, aya aya yeya, Negur kono difouf, sineid temeid sigoreid wal difouf, disennẽdi di to de difiyẽdiyouf, fateul to dibodõf, 3 wau laa fiya sã, kiwai nigin weder tu keleya sã, taka dumen wogõya, yogo nigin kulatun fiya biya sã, nirãya, tobonunã biya nigin kiwai inoya, 4 ne tã kiwai ifenẽya, sibuya, kisim aya aya yeya, Negur nigin wau laa fiya ban bouwa nẽ oroya nigin wau laa fiya, 5 bouwedim dogol Negur nẽ tobonunã dõ dife fen, in megeir wa difouf. Idi age fediya so weid.

6 Age fediya anidim naab dimirek dile, fõ bun dile fen, kayau maleg didegneĩd, dogo neid kisi ulum diroukenẽdidig, kayau mosor beberikã anidi, oroya sane fire fire bun waud dalesedig, 7 kayau idi gai toku keleĩ daledig, anĩ ere, momoi anĩ to bagai keleĩdig. 8 Janes Jambres ado Moses kiwai difenen gen, tamo enidig momoi anĩ kiwai difenek, tamo anidi kisi gelele fiya ado, momoiya sã nigin itornẽdin. 9 Anĩ ere, idi gerõ bai to dilauf, ere nigin, tamo uru age difen gen, idi neid kũ fenẽya tamo kayau ganan meleid bun kaisã yaorouf.

Polem Timoti Ago Dõ Woi Fiyen

10 Anĩ ere, neu ifelnẽya, neu tobonunã, neu kisi gariya, neu momoiya, sain meluk totol ifareya, wau laa fiya, feseya sã ifareya, 11 kafĩ fiya, darau, naig be fiya Antiok, Ikonium ado, Listra taun bun darau morõ aya alen anĩ ganan õ keleĩ. Anĩ ere, Odug anĩ ganan bun tamal yalelnan. 12 Momoi, tamo kayau ganan, idi Kristus Jesus bun Negur nẽ tobonunã dõ difouf nigin orodiyouf are, idi morõ dalouf. 13 Agef mog, tamo sesen ado idegẽya tamo, sane bunem sane bagai lauf, tunĩ didegneĩd mog, abag didegnẽdiyouf. 14 Anĩ ere, ogo nigin, ereb õ keleĩ wale fen, momoi won anĩ toko tokõ wo ule, ere nigin, idi difelnon are õ idi nigin keleĩ. 15 Agef fen, õ simõ bunem Negur nẽ Itotoya fateul kelein, are õ isennõ di, kisi biya wale fen, Kristus Jesus nigin momoiya bunem, kel yaleyõya kisi feleyauf. 16 Negur nẽ Itotoya ganan are Negur awa uur neseya bunem, are ifelnẽya, sakãya, madur fiya ado, madur ibodõya tai fiya nigin biya. 17 Age fe di, Negur nẽ tamo, kabĩ biya ganan yaleya nigin kisi feleya bagai youf.